Cîgirê serokê civata Parêzgeha Kerkûkê û serokê Lîjneya Petrol û Pîşesaziyê yê li wê civatê Rêbwar Talebanî da zanîn, pereyê ku ji dahata petrola Kerkûkê bo îdareya bajêr dimîne, dikare çendîn projeyên stratejîk bên pêkanîn.
Talebanî got: “Di rewşeke asayî de, rojane nêzî 400 hezar bermîl petrol berhema me heye û eger kar bê kirin ew dê biçe 600 hezar bermîlan. Ev jî dikare çendîn arîşeyên bajêr çareser bike.”
Rêbwar Talebanî amaje bi wê yekê kir, bi wê dahatê dikare herî kêm di salekê de arîşeya avê ya bajarê Kerkûkê bê çareserkirin, jêrxana aborî bi wê dikare bê zêdekirin û çendîn projeyên avadankirinê bên bicihanîn.
Talebanî da zanîn, rewşa siyasî û ewlekariyê ya Kerkûkê jî ber bi aramiyeke zêdetir diçe û ev jî ji bo ciwanên bajêr derfetên kar diafrîne.
Derheqê bernameya bo xerckirina wê dahatê jî Rêbwar Talebanî wiha got: “Desteya hevahengiya projeyan ya Civata Parêzgeha Kerkûkê bernameya xwe dariştiye, ku zêdetir ji 3 hezar projeyan di xwe de girtiye û pêş 3 salan jî bi beşdariya hemû damûdezgehên Kerkûkê me planeke stratejîk darişt, ku bo 50 salên din projeyên me hene. Piraniya wan jî stratejîk in, wate di warê plane de çi arîşeyên me tune ye, hemû amade ne.Tenê pêwîstî bi pesendkirina hikûmetê maye.”
Cîgirê Serokê civata Parêzgeha Kerkûkê Rêbwar Talebanî da zanîn, ji her bermîlek nîv dolar vedigere îdareya Kerkûkê û ew pere jî pir nîne, lê ji bo çareserkirina arîşeyên avadankirinê girîng e.
—————
—————
—————
—————
